Viaju sicilianu

Furriannu-furriannu tra mari e paisi di Sicilia
di Filippo Maria Provitina (Prufètina, n’sicilianu)

Apirtura

Aviti mai taliatu a Sicilia ku ochi kusiritusi di vidila komu  idda viramenti eni, senza cirkarivi i tanti fiuri stiriutipati e i tanti lokura ka putissi nun aviri? Vuatri ka stati n’Sicilia, aviti mai statu n’Sicilia?
Iu nun saccu siddu sbaghu a kuntarivi a me spirienza, ma fu ka un iornu i cirkustanzi da vita mi ficiru rializari un sognu vechu kuantu a mia: a kanuxenza di tutti i lokura di l’Isula unni naxî e unni, dopo avirici jratu ntornu pi tanti anni, sempri turnava prontu a autra partenza, a autra skappatina.
Kistu succidia na trintina di anni apressu di aviri jà vistu kuasi tutti ddi posti, futukrafati pi kistu nâ me mimoria nkonxa n’modu tantu nkarkatu di farimili rikanuxiri a prima vista, senza sapiri di duvirimici atruvari e senza ka mai chu ci avia pisantu, e ku tanti partikulara di luci e kulura, di ummiri e di prufili, pinsinu di sònira, di fari mprissioni.
A mia eni, n’pratika, na narrazioni di lokura pikka kanuxuti, visitati ku ansia di studiusu, ntrizzata ku na spuntania rivisitazioni mnimonika di kuannu, chussai di un kuartu di sekulu prima, pa prima vota mi ci truvai a kaminarici kû spiritu juiusu di un piccutteddu di prima varba o, n’certi kasi, kû spiritu nfantili di un karusu tinutu ankora pa manu di so patri.
Stannu a kistu, nudda lojka di pirkurrenza jukrafika mi potti guidari a menti e a manu, essennu ka era u kasu a kunnucimi di kka e di dda , o, pu meno, u nkunsapevuli intimu disideriu di riviviri certi situazioni pi putirimi libirari di inkubi e di fisimi. Nudda nutizia storika, nudda nnikazioni artistika, sulu sintimentu e diskrizioni di partikulara ka nun sunu distinati a turisti prixalori ma a viajatura ntirissati a studiari u misteru da ripitibilità cikrika du Kosmu atraversu l’atirnazioni di l’imajni.
Certu, nun potti avitari di kalarimi n’menzu ê granni zoni arkiulojki o ê famusi cità o ê beddi ariali naturalistici di sta parti di munnu, ma sulu pi gudimentu pirsunali e no pi fini diskrittivi.
U jru ka fici mi sirviu pi kapiri ka nun asisti nuddu kuligamentu, sia nô beni ka nô mali, tra a Sicilia da prupaganna ufficali e a so vera idintità, ka nun eni komu nâ Skozia unni i kastedda sunu pezzi di storia pî turisti komu pî nnijni: kka, na sta terra strapazzata, i rudiri di Silinunti sunu pezzi di storia sulu pî turisti; pî nnijni, un munzeddu di petri ka eni un pikkatu nun putiri usari komu matiriali di kava jà travaghatu.
Eppuru, stu abannunu ci duna un faxinu riali, so, tuttu so, e a fa terra sidotta ka siduci.
Pi rivisitarimi rikurdannu i rikordi, pi skurdarimi di essiri un sicilianu asiliatu n’Sicilia, na sta terra vosi arivarici komu un navikaturi dî tempi passati, du mari, facennu u jru da so kosta e rigularmenti aprudannu na tutti l’isuliddi ka ci gravitanu ntornu. Pirò, nun sapennu dicidiri kuali avia a essiri u me puntu di partenza di dda banna ô mari, dicidî ka pi truvari a Sicilia propriu di idda avia a partiri.
Naxeru akusì sti appunti di un viaju n’Sicilia.

 

Skoghi

Eni un iornu umitu kuannu na matina lassu u portu di Marsala du me Kuntinenti, a Sicilia, n’dirizioni Mozia. Dopu na minzuredda di navikazioni kueta aprodu na un postu fatatu, chinu di arvuli fruttifiri e di vosku, e di macha miditirrania pupulata di vavaluceddi asunnati, furmatu di tri isuli vicini chamati San Pantaleu, Santa Maria e Skola ma, midemma, Longa, chu simpricimenti arcipelaki du Stagnuni. Iu u chamassi Edini.
Di dda mi partu facennu rotta versu l’Egadi. Pi strata nkontru l’arcipelaku dî Furmiki: supra na isulidda c’eni un kasteddu e tanti kapannuna; na nautra, chatta komu na tavula, c’eni na kasuzza. Nkontru, midemma, l’arcipelaku dî Purceddi e di iddu mi kurpixi u faru, kustruitu supra una dî so isuliddi, ka pari nu ubilisku ajzianu n’menzu ô mari.
Sti dui arcipelaki, komu l’autri furmazioni di l’Asineddi e dî Palummeddi e l’isulidda Makauni, sunu disabitati o kuasi.
Dopo tri uri di navikazioni arivu n’vista di na muntagna ka, pi effettu di partikulari riflessi davanti ô suli, pari naxiri dintra n’autra muntagna: Levanzu. I primi partikulari ka mi kurpixunu sunu vuskiceddi marturiati du kavudu, na strata di pinitrazioni n’forti pinnenza e un kampusantu sutta rokka, kuasi a mari, ianku.
Ci vosi na uricedda di viaju pi iunciri a Favignana, un gran linzolu di terra unni un jganti apuiatu a l’uvitu e ku n’testa un kasteddu pari ka si ci avissi stinnichatu di supra. Muriceddi a sikku a tistimunianza di kurtivazioni agrari, kasuzzi n’petra tipu ”sesi” o ”kuburi” a rikordu di l’attività pasturali dî tempi passati, na kupula  virdi a rikordu di nun saccu ki.
Nautra uricedda di viaju ku rotta sudovisti e mi avrazza Marettimu ku na menza kuruna di kasi ianki a forma di kubu, pusiziunati a menza-kosta di na muntagna avuta ka ci fa ummira na stu finiri di iurnata.
Lassannumi l’Egadi ê spaddi ci vosiru cinku uri bonu di mari apertu pi nkuntrari un munti anormi ka pa so forma mi fa viniri n’menti i denti di nu skualu: si tratta di Pantiddiria kû so vurkanu astutatu chamatu, oj, “muntagna granni”.
Ankora chu a minziornu, iennu pirò versu l’Afrika, dopu tri uri mi kunforta a vista da prima dî Pilaj, Linusa, kî so tri timpi pusati supra un tavulatu, d’unni, dopu nautri dui uri, arivu a Lampidusa. Kista pari na kutra stinnuta supra u mari, tantu eni chatta, e di chu, a limitari, eni afratata ku na isulidda disabitata ditta Dî Kunighi, patria di skuzzari di mari.
A na ura di viaju l’urtima di Pilaj, Lampiuni, na petra disabitata n’menzu ô mari.
Di ddoku, a esti, dopu oltri cinku uri, Marta pari na manu graputa, ricintata di muraghuna, e nê vicinanzi, a menza-uricedda, Kuminu eni na petra n’menzu ô kanali e Gozu na macha gallijanti a mari.
Dopu di ki, passannu vicinu a l’isulidda di Kapu Passaru, na atravirsata avintirusa mi porta oltri u strittu di Missina nsinu a farimi nkuccari Vurkanu, una dî setti soru Eolî. Idda mi apari, vilata di xirukkusi russastri riverbiri kripuskulari, komu na suprapusizioni nfinita di timpi ka, manu-manu ka mi vaiu avicinannu, si distingûnu n’kuattru muntagni, e apodi n’cinku muntagni e n’kosti frastaghati a difisa du portu mentri apari midemma na bedda lingua di terraferma.
Ê spaddi di idda, jà sfaviddanti di middi luci, viu Lipari: dui faraghuna pricedunu nô kanali tra kisti dui u portu nkuniatu n’menzu a dui prumuntorî e prutijutu darreri di na gran muntagna. Avi kasi tincuti ku kulura dilikati. Pi iunciri a Panarea ci voli kuasi na ura: sumigha a San Fulippu vista da parti di Aghanu e avi kasi ianki. Disabitati sunu Basiluzzu, a forma di kuruna di rijna o di forti xiddikata ku isulidda a manka o di kasteddu di magu a sikunnu di unni si talia, Liska di Pixi, na rokka a pizzu, e i Furmikeddi, isuliddi sparpaghati ntornu â Liska.
Nautra menza uricedda di navikazioni pi rennimi kuntu ka dda gran saguma ê spaddi di Basiluzzu nun era autru ka Strummula e, â dritta di idda distanti un mighu, Strummulicha ka, vista di vicinu, pari un gran kubu. A Strummula viu ka nâ n’sinatura, n’terra-ferma, c’eni, priva di portu, a kumunità di Jnostra: na stu mumentu napoku di varkuzzi di piskatura lukali stanu facennu ponti kû pustali ka veni di Milazzu.
Apodi, dopu dui uri, Salina, kumposta di dui granni isuliddi pu fattu ka tra i dui munti c’eni na vaxa vaddunata, e, dopu nautri dui uri, Filikudi, kâ so forma a sedda o a ferru di kavaddu.
Na menzura, passatu u pinnakulu di Kanna e na vicina isulidda, mi si prisenta un timpuni di lava ricenti: Alikudi.
A mprissioni ka aiu visitannu l’arcipelaku di l’Eolî eni kidda di essiri a Vinezia, n’menzu ê so kanali, o kidda di meghu kapiri “I cità du munnu” di Vitturini.
Pensu, apodi, kuasi kumuvutu, a tutti ddi isuli ka mai anu vistu u celu, o ka si anu nabissatu n’tempi luntani, e mi veni u dubbiu ka iddi putissiru essiri filici di truvarisi ô skuru dî bassizzi umani di supirfici.
Ci vonu assai uri pi arivari a Ustika, isulidda ka si stenni a forma di skuzzara o di kukudrighu, rikka di voski e kî murati dî kasi pittati.
Di ddoku, ankora tri uri e tokku Sicilia: u gurfu di Munneddu, survighatu dî dui prumuntorî Munti Piddirinu e Munti Gaddu, eni cintu a menza kuruna di munti; u Piddirinu pari na navi ku puppa, prua, kasteddu e cimi.
Viu midemma l’isulidda Dî Fimmini e, nfini, Palermu, riparata dî muntagni ka cirkunnanu a konkadoru.
Stu viaju di avicinamentu â Sicilia partennu da stissa Sicilia, fattu kâ cirkumnavikazioni dî so arcipelaki e isuliddi, mi priparau â visita di l’Isula Granni ka mi pari, rispettu a tuttu ddu mari unni gallijavanu skoghi, komu podi apariri a un tidesku l’Auropa dopu essiri statu n’Sicilia o n’Sardegna: un kuntinenti.
Pikì na sti skoghi mi sintia si vurnirabili komu supra a na varka, n’preda ê krapicci da Natura, ma chu vicinu ô Kriaturi, mentri na l’Isula Granni mi sentu si ô sikuru, ma chu n’menzu ê mali di l’omu. Ora meghu possu kapiri u karattiri di l’abitanti dî skoghi, komu meghu i viajatura aurupei kaperu u karattiri dî siciliani dopu aviri visitatu l’Isula Granni.
Fu akusì ka, dopu kuasi trentanni, chu forti e chu debuli, ritrovu, kunnucutu du kasu e, alivoti, di un bisognu amuccatu, lokura antiki sulu aparintimenti skurdati. Pi stu mutivu pi diskrivili mi piaci di usari ankora a prima pirsuna singulari, ma nâ forma passata e no prisenti.

 

Terraferma

-1-

A prima vota ka ivi â grutta da Gurfa, n’Kumuni di Alia, mi parsi ka mi avia persu na nu nsonnu, na unu di ddi nsonnira, unni unu pari di essiri n’biliku tra u pirikulu di moriri e a cirtizza da nkulumitadi.
Nun kanuxennu u postu, ivi prima n’paisi. Ddoku mi nfurmai da strata ka avia a fari e, komu-fu-komu-nun-fu, mi truvai spersu kampagni-kampagni avennu pi guida sulamenti na karrittera disastrata pi tanta akua ka ci avia skurrutu di supra lassannu kka e dda spechi unni si abiviravanu acidduzzi akalurati pu forti suli di dda iurnata ka avia fattu sikkari terri kritusi e nudi.
Arivai, finarmenti, e mi parsi beddu.
C’era na grutta a kampana, tantu granni ka dintra ci putia trasiri un paisi; e autri grutti c’eranu, a latu e supra, e tutti eranu skavati da manu di l’omu ka avia partutu di un pirtusu nâ parti avuta iennu a xinniri manu-manu alargannusi e rikavannu midema a kamira murtuaria senza nudda autra apirtura. Sulu apressu ci fu graputa na finestra e a “kampana” fu suparkata, e n’kurispunnenza ci vinniru skavati autri grutti pi rikavari no chu sipukri ma stanzi di abitazioni.
Kuantu grafiti anu lassatu i jenti nâ so facciata (n’sicilianu, n’latinu, n’finicu) e kuantu bedda fu sta me skursioni.
Ô ritornu, nuddu pubrema: mi truvai pi subitu nâ strata statali ka kunnuci n’Palermu. E siddu nun avissi statu ka nâ me kuddizioni aiu ankora pitruzza pruvinenti du chanu davanti i grutti, unni mi riciviu u prupîtariu (e kustodi furzatu e abusivu) di sta miravigha, pinsassi di avirimi nsunnatu.

 

-2-

U iornu ka, lassannu a komuda autustrata PA-TP, nixî ô svinkulu di Muntilepri pi achanari a Munti Parmita, mi parsi di passari ddabanna â porta du passatu. Alivoti pikì l’ochi si avianu jà inchutu dî munzedda di petri ka si truvavanu kka e dda nâ vaddunata du Kanali Mirceni, alivoti pikì, kaminannu-kaminannu, mi truvai na un postu suspisu tra mari e celu unni sulu si sintia “u rumuri du silenziu”, mi pighau na kosa komu siddu nun mi avissi dispiacutu di ristari dda pi sempri.
Asittatu supra na rokka di Pizzu Pavighuni, spurjenti n’menzu a antiki furtifikazioni sdirupati, vutai i spaddi ô mari e mi misi a taliari, ku sempri chu ntiressi, i munzedda di petri ka rikamavanu ddu chanu di muntagna n’kumuni di Karini.
Eranu petri ka nun avianu statu amunziddati pi spitrari (ntornu a iddi era tuttu petri), e manku pi kuncintrari matiriali utili pi kustruzioni (nun ci sunu ne mai ci anu statu kustruzioni a parti i furtina ka si vidunu), nonsi, eranu, nveci, e mi parsi charu, i munzedda funirarî dî surdati di Amirkari Barka.
Poviri picciotti, morti sutta stu suli di Sicilia, na stu loku dittu Eirkti ka Pulibiu nnikau tra Erici e Palermu, unurati dî so kumpagni ku sti munzedda di petri a nkastru, a forma aprussimata di omu kî pedi vutati a ddu mari unni i navi di kuligamentu ku kiddi chu granni lassati a Ustika si anakavanu vijli nô gurficeddu di San Kataudu.

 

-3-

Fu beddu kuannu, tra Rakkuia e Muntarbanu mi mmattî na na chana pi mità aturniata di avuti timpi e pi l’autra mità afaccata a vadduna, komu fussi un granni anfitiatru naturali.
Dkoku, n’menzu a tanti petri n’menzu ê marj, c’eranu veri e proprî “grutti” kustruiti fori terra ku cappi ka, partennu di na basi cirkulari, pusati una supra l’autra, ivanu a-strinciri-a-strinciri nsinu a lassari n’cima un pirtusu ka vinia ntuppatu ku na urtima cappa chu granni di tutti l’autri.
Trasennuci di na apirtura ku tantu di kurnici, lassata aposta dî kustruttura, dda dintra unu si trova subitu komu n’kasa so, kunfurtatu e sikuru, frisku di staxuni e kavudu di nvernu: si kapixi ka na tanti sekuli l’omini di kampagna l’anu usatu pi tanti skopi. Ma ki diku pi tanti sekuli? Pi tanti dicini di sekuli, kunsidirannu ka naxeru komu tombi. Sisi, komu tombi, e pi sta kosa si chamanu “kuburi” (di l’arabu ka voli diri, pi l’appuntu, “tomba”).
Da parti di dintra, nfatti, si vidi na speci di kunnuttu beddu nkurnicatu, unni vinia fattu passari u mortu pi iri a dormiri, na un lokulu sutta terra ddabanna ô kuburu, spostu a manka, u so sonnu aternu. Simu, kuasi di sikuru, ê tempi da civilità sicula, ô menu middi anni prima di Kristu.
Apressu, l’arabi, ka i chamaru tombi na so lingua (“kuburi”, apuntu), i utilizaru va vidi pi kuali skopi, tantu ka nô menzu di stu anfitiatru naturali, unni a faccata di avuti timpuna po essiri ntirissanti nikropuli pi certi signi ka vi si vidinu, atruvai na statua primitiva, senza testa, pensu pricidenti a l’arabi, ma unni l’arabi ci avianu skurpitu na skritta: Allà.

 

-4-

Ki amuzioni, truvarisi n’cima a Munti Kastiddazzu e sapiri ka dda, ê tempi antiki, era arukkatu l’urtimu gruppu di Sikani battagheri, urgughusi ô puntu tali di risistiri nenti di menu ka ê lijunari rumani.
Nâ suttastanti chana di Kartabillotta, unni ci furu i fatti d’armi da sikunna guerra sirvili di Sarviu e Atinioni kontra u konsuli Manliu Akuiliu, ci sunu ankora tracci arkiulojci signifikativi e mimorî antiki. Di dda supra, si po diri ka si sentinu ankora i rumura da battagha, persa n’partenza, di un populu ka avia fattu oramai a so parti nâ storia da Sicilia.
Skunfijuti ka foru Sarviu e Atinioni, nun c’era nuddu mutivu pî rumani di iri a skuvari sti urtimi supravissuti: s’avissiru persu, jnitikamenti, funnennusi, pi rajuni di supravivenza, kî jenti da chana ka “Sikani” chu nun eranu.
Komu sucedi pî Nniani da Merika akusì sucessi pî Sikani di Xirtea-Kristia a Kratasi vicinu Burju. Na sti pizzi di muntagna furtifikati, kuligati tra di iddi ku stratuzzi mpervî, taghati fora dî fertili terri oramai kurtivati di autri patruna, mpussibilitati a kummattiri kontra un nimiku nvisibili komu eni u “prugressu”, kunnannati da Storia, nun ci putia aristari autru ka xinniri e kunfunnirisi kî vincitura-vinti.
E akusì fu, ô Kastiddazzu, ora sulu petri asdirupati, e tantu silenziu.

 

- 5 -

Fui, un iornu, a S. Ancilu Muxaru, e dda visitai a grutta ditta “du Principi”.
Ki prîu ka ni appi nô vidiri ddu skavu fattu tantu pricisu di asumighari a na strummula kapuvurjuta: ni appi a mprissioni ka adirittura sta strummula stassi furriannu.
Kista era a stanza sipurkrali, unni u mortu vinia pusatu supra na nuda petra, a latu a autra stanza unni i parenti facanu u kunsolu asittati supra panki rikavati nâ viva rocca.
Na kosa ka nun capî (tra i tanti kosi ka manku mi akurgî di nun kapiri) fu a ki putia serviri na speci di kunkicedda, granni kuantu un vacili, ka avianu skavatu vicinu ô sidili a manka trasennu. Pinsai ka putiva serviri, alivoti, komu kuntinituri di na xamma vutiva.
Ddoku, propriu unni Sant’Ancilu fici fuiri i virseri ka pa rabbiatura spakkaru a kruci nsinu u pavimentu di rocca.
Tanti autri grutti visitai, sparti di kista, e kuasi tutti avianu (ku chu ku menu) a karattiristika di kidda “du Principi”. Mi mprissiunau u kustuni chinu di grutti di kuntrata “Grutticeddi” ka certu, ê tempi antiki, appi a essiri u kunnuminiu di na tribù para-para.

 

-6-

Visitari u loku unni cinku sekuli fa si riunianu l’abrei di Ajra fu na amuzioni forti ka mi tegnu ankora n’menti.
Stu tempiu, ka apodi, nê tempi, avia statu kunsakratu a chesa kristiana e ka alivoti, n’tempi assai antichi, avia statu korki struttura krassika, e ka pi certu nô ‘600 avia uspitatu l’arimita Diegu di Sinagra, nun avia chu u tettu e avia midema persu pezzi di murata. U pavimentu, nveci, si vidi ankora ka era amadunatu a krita.
Ku tuttu kistu, ristannu iddu l’unika sinakoga di tutta a Sicilia pi kulukazioni certa e mantinennu idda a struttura di obriku dî sinakogi (anti-sala e sala di prîera), mi paria ankora di truvarimi na un loku sakru unni avia a parrari apassiddu e unni avia a kaminari n’puntu di pedi.
L’arônni, n’petra skurpita a rilievu e pi kistu mutivu e pa datazioni uniku ô munnu, avia statu pricidintimenti spustatu nâ chesa majuri e dda u ivi a taliari.

 

-7-

Nô tettu da Sicilia (e nun sulu da Sicilia!) mi ntisi komu a kiddi ka, oramai, nun anu chu nenti di vidiri, komu a kiddi ka anu kumpritatu a propria asistenza tirrena.
A kunsapivulizza di putiri di un minutu a l’autru fari a fini di Mpedukri, vali a diri di finiri mancatu di Diu Vurkanu, era akusì forti di spirari kuasi-kuasi ka si virifikassi.
N’biliku supra barkunati spurjenti supra vauzi chini di foku e di fumu, veri e propri furnaci, ddabanna ê xakkazzi di minutu-n-minutu chu largi ka avissiru pututu fari cediri i barkunati, a ddu stissu mumentu komu centu anni dopu.
Skugnannumi di ddoku, korki metru chu a dda via, sbumikava dî chai da terra nu sbuffu di matiriali lijeru komu na negha ka subitu si ragrumava e kuaghava komu fussi na sponsa di kuluri jallu-russu-azolu-ianku.
Dda supra, a kuota 3333 di Munjbeddu, a terra eni ankora un pezzu di stidda.

 

-8-

Ê tempi, kuannu n’Sicilia i xumi si avianu a passari a guadu, a Kapudarsu vinni kustruitu un ponti di mirabili fattura, tantu ka sta opira fu nsiruta tra i miravighi du Regnu.
Oj, ka di ponti ci ni sunu middi-e-unu, nun fa chu mprissioni siddu kistu ku na granni munumintali arkata, avuta e longa kuantu a fami, skavarka l’Imera miridiunali iuncennu dui muntagni ku autri dui arkati minuri ka kunsentunu u passaju di strati vaxi.
Epuru, ci fa ankora a so bedda fiura, pi aliganza e funziunalità, speci siddu si kunfronta ô mudernu kravakka-strata da viluci Kartanissetta-Enna.
Miravigha du Regnu, ku Muncibeddu e kâ funtana Aritusea, skrissi di iddu L’abati Fleuri nô 1853, e si po kapiri pikì fici sta granni mprissioni pinsannu a iddu komu simpulu di prugressu a chusura di na ebika di skurantisimu ka avia kuminciatu kî vicirè spagnoli e ka, purtroppu, era distinata a kuntinuari ankora, tantu di ufenniri nô XX sekulu stu stissu magnifiku ponti amuccannulu e kunfunnennulu n’menzu a napoku di pilastri di cimentu armatu.

 

-9-

Kalari ku nu axinsuri traballanti pi cinkuanta metri n’virtikali vidennu chuiri a-pikka-a-pikka a finestra di luci da trasuta, truvarisi apò nô skuru chu tutali kurkatu dintra na karriola ka prucedi a xiddikalora ku antiki sistemi di trazioni supra un binariu di centu metri pusatu na nu strittu vudeddu n’menzu â terra e chinu di aria surfarusa, putirisi isari ô puntu di arivu pi sguazzari n’menzu a akua puzzulenti e anaspari tra omini sudati…
Avissi pagatu assai pi nun truvarimi dda sutta e midema assai avissi pagatu pi nun duviri rifari a stissa strata da xinnuta!
Ma tuttu, nâ vita, eni kuistioni di abitutini: dopu pikka tempu (un minutu? un iornu? na vita?), a ura di spartiri pani e tumazza, alivi e vinu, barzilletti e rikordi, puru dda sutta, a Jangaghanu di Asaru, parsi un padarisu.

 

-10-

Middi e passa anni di akua anu skurrutu sutta un ponti di petra forti komu azzaru, e mai l’anu uffisu, e mai l’anu kunfunnutu: akua di nivi skuaghata di munti “Muntimunti”, limpida e fridda komu lama di kuteddu, taghenti supra xari antiki komu diamanti supra diamanti. Apressu a iddu, ponti saracinu di Cintorbi latu Adirnò, kaskateddi di akua asummanu biddizza a biddizza e a vista godi di natura e arti miskati na un postu unni arkiukuja eni tistimunianza di storia antika di populi forti e njgnusi.
Kuntrati preni di umura tirragni dunanu frutti sapurusi e xauru di suli e di celu.
I sakki di munizza sparnizzati ntornu a iddu ponti parunu xuri e i kani rannaj, dixinnenti dî guardiani di sikuli templi, sacirdoti a passiu.

 

-11-

Nun avissi mai pinsatu di putiri essiri karruzziatu sutta terra dintra na komuda makina sfriccanti, viloci, supra larghi strati n’menzu a un traffiku di mezi pisanti rigulamintatu di tabidduna stratali e simafura.
Epuru, a Raffu di Pitralia Suprana, succedi propriu kistu a ku visita a pirrera di sali, prufunna novi piani, tra nkroci di strati addumati di lampadini ka akuluranu di ghaccu i mura dî gaddirî.
Ruspi arajati sganganu i murati e karikanu u matiriali nê kamiuna pi farilu purtari n’supirfici. Ogni tantu, korki upuraiu trova nu “ochu di sali” e, lestu, su metti n’sakketta pi rigalarilu a  pirsuna kara du “munnu di supra”.
L’aria eni strana: sikka. Mi pighu na petra e mâ sarbu. Ankora oj, komu na sponsa a kumannu, cedi akua di nvernu e si l’asorbi nâ staxunata.

 

-12-

Kuannu fu ka mi truvai nâ zona dî Makalubi mi parsi di essiri na nautra pianeta, e mi potti pighari di kuraju sulamenti kuannu, spaziannu ntornu ku l’ochi, vitti ristucceri e arvuli vicinu a kasuzzi spersi terri-terri.
Ku tuttu kistu, turnannu a taliari “dda kosa” unni mi avianu purtatu i pedi e a kusirità ka mi avia dirivatu di nu risukuntu di viaju, mi ntisi u stissu komu atinaghatu di gravi pirikulu.
N’menzu a na kalura di moriri abruxatu, na distisa komu di ciniri nkuddata, kuluri azolu charu e griju o griju-viola, vinia ogni tantu spirtusata di fangu likuitu amuttatu dî gasi ka di notti, mi dissiru apò, si vidi addumari ô kuntattu ku l’aria dannu loku a lijenni di spirdi e fantasimi.
Stu vomitu da terra nun eni autru ka krita di purissima kualità ka dî suttastanti strati alakati achana skuaghata pi dda pikka avutizza nicissaria a furmari koni e kuniceddi vurkanici friddi, facennu nu skruxu komu kuannu vughissi na pignata china di pumadoru skaccatu.
Nâ skarpatedda di un kuniceddu, na tizzunita avia ristatu mpiduta a prucediri e a krita si ci avia sukatu tutta l’akua, ntiramenti disidratannula.
Vulia iri a vidiri nautra analuga manifistazioni vicinu ô nuovo kampu spurtivu di Kartanissetta, ma nun a rinixî a truvari.

 

-13-

Kapitau, na vota, ka, truvannumi spersu muntagni-muntagni nâ zona di Karunia a cirkari a kuntrata unni si urijnau middi e passa anni fa u me kugnomu, dopu aviri atravirsatu vaddi e timpi, timpi e vaddi, arivassi na un chanoru di arvuli unni mpruvisamenti si afaccau un tepidu suli.
Mi firmai, attentu, e stetti. Nun c’era u minimu rumuri. Apò, na ddu silenziu tutali, ntisi na strana vuci, komu di picciriddi ka iukavanu tra iddi skirzannu e ridennu a passiddu. Mi ntisi chamatu: Fulî, Fulî, Fulî…Iu ivi versu u puntu dunni vinia stu sonu, e kapî ka na cersa mi stava “parrannu”, na cersa morta a l’additta.
Veru miravighatu, dopu ka mi avicinai nsinu a kapiri ka i vuci vinianu du so ventri, nsinu a kapiri ka stu arvulu sikku mi stava parrannu pi dirimi ka era kiddu u loku dî me antinati, l’avrazzai e mi misi a chanciri lakrimi di joia.
Fu tannu ka iddu si zittiu, fu tannu ka kapî ka avia divintatu kasa di aceddi e armaluzzi, fu tannu ka a negha turnau pi skurari u suli.
Passau un vuiaru e mi detti kunferma: kiddu era u kori du eksi feudu Prufètina.

 

-14-

Sarà pa nostra natura di armala skantulini, sujetti a duvirini prutejri pi dibulizza fisika di autri armala chu forti, ma eni ka kuannu trasu na na grutta mi sentu komu dintra u ventri di me matri. Speci kuannu saccu ka kista nê tempi passati à statu abitata di arimita, di santi, di primitivi.
E alura, ogni skagha di petra mi pari ka avissi statu un pizzuddu di attrezzu di l’arimita (komu nô kasu da grutta di Diegu di Sinagra) o ka macha di virnici fussi na majni mirakulusa (komu nô kasu da grutta di San Fulippu di Ajra) o ka a ogni fissura kurispunnissi un signu arfabetiku o un grafitu di antiki kurturi (komu nô kasu da grutta da Rijna di Palermu).
Visitari grutti, skavati o kustruiti, divintau a me passioni e a me passiuni, kurrî midemma kuannu na kidda ditta dî Cauli di S. Ancilu Muxaru si afaccau a majni di patri Piu kumposta du lippu krixutu na na nuttata a forma di kapiddi, dî supracigha, di varba, ecc., du famusu kappuccinu di Pitrarcina.
Ma chu granni amuzioni mi pigha kuannu si sapi o si vidi ka sti “grutti” furu midema tombi di jenti antika di mighara di anni e ka, alivoti, ddu pruvulazzu ka si skarpisa po essiri kiddu ka resta di iddi.

 

-15-

Kuannu pensu ka c’eni jenti (midema siciliana) kunvinta ka n’Sicilia tuttu eni bruxatu du suli e ka i terri sunu  sulamenti ristucceri o pratirî, mi venunu n’menti ddi vaddi chini di arvuli urijnarî e di spechi di akua pirenni ka si trovanu pi dicini e dicini di kilomitri nê dursali dî muntagni e, kka e dda, na tanti chani e vadduna e a banna di marina.
Kuantu voskira, kuantu furesti, kuanta friskura, kuantu prîu pi maskuli e fimmini, vechi e piciriddi ka n’korki modu skoprinu sti padarisa e i frikuentanu pi skampagnati e passiati, pi kociri karni o fari funci o sparaci, pi pighari akua di surgenti o cirkari krastuna.
Eni nô kuntrastu ka si avi modu di aprizzari meghu a biddizza du jallu ka akulura i kampagni kurtivati a lavuri nê timpi di l’intraterra sicilianu, unni si pruduci frumentu duru di supiriuri kualità e aina e oriu pi vestî e armala, unni machi di virdi sunu sulamenti kiddi spinusi dî pali di fikudinnia, unni arvuli sulitari di aliva o di aukalittu, di karruba o fastuka o minnulera, parinu fatti di prastika e misi dda pi ngannari korki acidduzzu spirdutu.

 

-16-

Mi dumannu komu un kristianu potti skurpiri tanti petri e tanti arvuli, senza kampari ducentanni, senza aviri aiutanti, senza strumenti e attrizzaturi muderni.
Epuru, ku tuttu ka napoku spireru, si parra di cintinara e cintinara, appi modo di vidiri mighara di testi, ognuna ku na sprissioni diffirenti, ncimintati komu tanti brighi a limitari dî stratuzza ka partennu da trasuta achananu a skursuni nsinu ê grutti unni midema i spurjenzi sunu skurpiti a raprisintari facci supra facci. Ma a forma di testi (ku una e chu facci) sunu skurpiti  rokki e pitruzzi dî vari chanora e radiki fori terra di arvuli di aliva e di autri specî.
Certu, kapixu  ka u Kumuni di Xakka i vosi sarvaguardari aliniannuli e pusiziunannuli n’manera fissa kuannu fu ka dicidiu di fari un parku dî miravighi du tirrenu unni stava di kasa stu artista spuntaniu, ma di sikuru avia a essiri nautra kosa kuannu tutti sti testi si truvavanu dda unni Bintivegna i îa a-manu-a-manu skurpennu, nô postu unni i truvava o unni u so ciriveddu ci sujria di irili mittennu, senza jumitria studiata, ittati kka e dda n’modu ka â so morti i postiri l’avissiru duvutu atruvari komu na skuperta, komu na kacca ô tisoru.
Tannu, persi u trenu pi un pilu e nun potti viviri sta amuzioni. Ci ivi ka era oramai troppu tardu.

 

-17-

Kuantu skaluna achanaru fighi di mamma disgraziati e kuantu skaluna xinneru fighi di mamma sfurtunati: nfilici i primi e i sikunni, turki e siciliani, nfilici Sikuliana ka appi sta skala naturali unni si kunnuceru i pirati di mari n’terra pi rubari pruvisti e juvintù.
Skaluna ianki komu palumma, vagnati di akua salata e di lakrimi ka u tempu nun po azzumpari.
Skaluna ka rikordanu ankora a parrata dî kritisi di re Minossi, di kuannu vinni a truvari u so kulega sicilianu Kokalu nô regnu sikanu tra Eraklea, Muxaru e Xirtea-Kristia.
Skaluna ka kunsentunu iokira fistusi di piccotti fukusi ka i usanu pi fari provi di forza, sia a xinniri k’achanari, e adimustrari ê fimmini da kumpagnia kuantu sunu forti e viloci, bravi e kurajusi.
Ddoku c’eni a prova di komu po, na opira d’arti da Natura, essiri kosa binefika o dannifika n’basi a komu si usa.

 

-18-

Sulamenti a kunsapivulizza ka prima di mia ci avianu trasutu mighara e mighara di kristiani mi detti animu pi kuntinuari a kaminari a straxikuni na ddu vudeddu skavatu nâ rokka ka kunnuci â grutta unni Rusalia Sinibaldi stetti, luntanu dî vizi tirreni, akuchannu ddi meriti ka l’avissiru fattu, apò, prukramari Santa.
Parrannu di sta grutta ka si trova tra Santu Stefanu da Kuiskuina e Bivona, mi pari justu pricisari ka eni fora du paisi, kumprisa na l’ambitu di un munasteru ku tantu di chesa, ê marjni di un vosku beddu komu ci ni sunu pikkaredda, e mi parsi kuasi un pikkatu ka dda bedda grutta eni, n’pratika, prijunera di na granni struttura kunvintuali.
Turnannu a diri da sinsazioni di pirikulu ka mi pighau truvannumi nô vudeddu skavatu na rokka, kuannu jà mi parsi di essiri mpussibilitatu a turnari narreri, mi truvai nô slargu unni stava Rusalia (oj raprisintata di na statua di marmu) e dda, finarmenti putennumi jrari, pighai kuraju dopu u skunfortu e, lemmi-lemmi, potti nexiri ô skupertu turnannu ô puntu di partenza (un kurridoiu di kunventu).

 

-19-

Nun c’eni pijori kosa di vidiri na funtana sikka. Mi kapitau iennu ô me paisi unni, dopu tanti anni, vulia avicinarimi ê lokura da me nfanzia.
Tra i kosi ka î a taliari ivi midema na na kuntrata ditta “Vukali” unni l’akua surjiva kurria a fruxu di napoku di kannola prima di nkanalarisi na un vadduneddu ka taghava kampi kurtivati a ortura e iardina.
Ô postu di na abiviratura di pitrazza ntaghata ku lavaturi unni sgiccavanu kannola di ferru antiku ka nixevanu da murata di rokka, c’eni na vaska mpurtanti suvrastata di rubinetti di uttuni mbiddittati.
I grutti, ka ê so spaddi guccavanu akua di tanti pinnakuliddi karkarî ka s’avianu furmatu nô suffittu, avianu statu “puliziati” e addumate, e nun c’eranu chu ummiri mistiriusi e i pavimenti eranu nchanati.
E u chanu, prima chinu di centuruppa, di lippu e di middi autri erbi, ora eni nudu, nudu e axuttu, sikku, sikku komu a funtana du “Vukali”.
Ki dilusioni, nun resta autru di fari ka kancarici nomu.

 

-20-

U paisi di Prizzi era disertu di jenti kaminalora ma iu kaminava u stissu kunfurtatu na ddi stratuzzi pikì vidia jntuzzi assittati a chachariari nê kurtighi o fermi davanti a porta di kasa o afaccati ê finestri.
Mi miravighau assai kuannu kapî ka tutti ddi kristiani ka parianu di karni e ossa eranu nveci fatti di kulura amiskati di un bravu pitturi, e ka ddi porti e finestri, ddi stissi kasi, manku asistevanu pi nenti essennu midema opira di artisti ka utilizavanu i murati nudi dî kasi “veri”.
E ddoku mi parsi afrijusu e kuasi-kuasi spavintevuli, sapiri ka ddi maskuli e fimmini, ddi picciriddi e armala, nun eranu autru ka ummiri. Skarapochi nkapaci di dari na nfurmazioni, di stenniri na manu, pi nsinu di vidiri ka iu passava di ddi parti.
Mi ni ivi ku nu skunfortu nô kori peju di komu siddu avissi statu na un cimiteru disertu, n’menzu a spirdi e rikordi luntani.
Pensu sinciramenti ka i kuatri anu a stari apizzati nê musei e ka i paisi anu a essiri pupulati di jenti “viva”, nonsi di omini muti e nkapaci di difennisi e difenniri di priputenzi e mali-parti.

 

-21-

Atuppai a Paluzzu Adrianu na na vecha gaddiria firruviaria oramai dimisa unni, pi kuncissioni du Statu, un privatu avia attivatu na kurtivazioni di funci.
Kaminari dda dintra, n’menzu a un xauru di suttavosku komu dopu ka na famigha di porci sarvaj à skafuliatu a terra, duna un sensu di virtijni midema pi l’umidità mantinuta a liveddi akusì auti di livari u rispiru.
I funci eranu addivati n’kaxitteddi di prastika unni a terra, jà nsiminata, vinia vagnata ogni tanti uri ku un fruxu di akua a nevula ka mpîgati sulerti pruvidevanu a raziunari.
I kaxitteddi, a diversi piani sia a manka ka a dritta, kuntinevanu a kurtura nê diffirenti fasi a-manu-a-manu ka si îa avanzannu sutta terra pi cintinara e cintinara di metri: ci n’eranu ku terra nuda, ku miceti appena naxuti, ku funci niki, ku funci medî e ku funci pronti pi essiri rikughuti.
E apò c’era u ripartu unni si mittia a terra jà usata e kiddu unni si mittia a terra  di utilizari pa prossima kurtivazioni. Dda iurnata mi saziai di funci sulu a taliarili ku l’ochi.

 

-22-

Supra Frazzanò c’eni un munasteru abannunatu dittu S. Filippu di Fragalà. U vosi iri a visitari pikì avia ntisu diri di iddu, pî tempi antiki, granni kosi.
Pari ka avissi avutu un putiri immensu, dicini e dicini di monaci e frati, renniti e cespiti di ogni jeniri, kuntatti mpurtanti kû Regnu e ku Stituzioni di oltri mari, mighara di pirsuni n’korki modu ligati.
Oj, n’veci, n’menzu a l’abannunu tutali, tra surci, piddottuli e tetti kaduti supra skaffalaturi di libra e rijstri, nun appi manku u spinnu di pinsari ê spirdi di abati e priura, di santi e pinitenti, ne â mimoria di iddi.
Fu ddoku ka, skunsulatu, e pinsannu a kuantu nsignifikanti e timpurali eni u putiri di l’omini, dicisi di turnari supra i me passi e di lassari, pi sempri, ddu loku.

 

-23-

Mai kuntrastu fu chu forti nâ rikustruzioni di un centru abitatu.
Jbiddina “vecha” aristau un munzeddu di macerî abannunati a akua e ventu, a suli e jelu, abitata di vurpi e surci, di skursuna e di middi autri armala e armaluzzi ka manku ci pari veru di aviri na cità tutta pi iddi, di putiri trasiri e nexiri dî chesî e dî kasi e achanari a krapiccu i skalunati du palazzu municipali o afaccarisi ô barkuni du baruni.
Na nautra parti, a distanza, i jbiddisi si nsidiaru na napoku di kasi fatti a kaxa, prima di lanna, apò di muratura, cirkunnati di munumenti ka pikka anu di miditirraniu e pinsinu di tirrestri.
Veru eni kuannu si dici ka pari un museu, stu paisi, ma nun si dici ka nun pari un paisi (sicilianu, voghu diri).
E, ntantu, na “granni” opira kadiu manku u tempu di grapila: a chesa a forma di badda.

 

-24-

Ki kosa bedda! Puru ka chuvia o faca friddu o kavudu o c’era negha o ventu o un suli ka spakkava i petri, unu si putia u stissu godiri na passiata ku l’amici, tra na assittata e nautra a un tavulinu di kafè, senza vagnarisi o nfridulirisi, o sudari o pigharisi di umidità na l’ossa, o skumpigharisi i kapiddi o aturrarisi u ciriveddu.
Kistu putia sucediri grazi ô fattu ka a Kartajruni u Kumuni avia pinsatu di kustruiri na granni gaddiria pa mostra pirmanenti da ciramika lukali, spaziusa e lastrikata di marmu, ku tantu di vitrini nê murati latirali e un kafè ku pasticciria e sirviziu ijeniku.
Kuanta jenti, pi korki mutivu stanka di stari a l’additta nô chanu du Municipiu, truvava e trova rifrijeriu e riposu nâ tantu uspitali e kunfurtevuli “chazza kuperta”. Kuantu piccotti, askutannu a musika du juboksi, prima e dopu da skola s’assittava e s’assetta ê tavulina du kafè, sutta l’ochi vijli di tanti pirsunaj illustri raprisintati nê rikuatri n’ciramika du suttatettu, pi kummintari a iurnata o fari prukrammi pu futuru o, simpricimenti, pi chachariari du chu e du menu.

 

-25-

Po na fridda balata di marmu sustituirisi a un pedi di nuci amatu n’vita nê mumenti chu intimi di joia e di dispirazioni, di kummuzioni e di rilaksi?
Po un frastuonu di na strata transitata di Rakarmutu e u parraciniu dî jenti paragunarisi ô silenziu di na kampagna unni u sulu rumuri eni u chachariu di aceddi, api e cikali?
Po un visitaturi na un cimintifikatu kampusantu kuncintrarisi supra i pubremi asistinziali, supra a grannizza di nu spiritu e a nichizza di l’omini, â stissa manera di komu fussi a l’ummira di nu arvulu?
Alivoti Xaxa pinsava a tutti sti kosi kuannu dica ka ci avissi piacutu di essiri adivukatu sutta u pedi di nuci du so puderi unni era usu pinnikuliari, riciviri amici di littri, di nfanzia e kampagnoli, riflettiri.
Alivoti Xaxa pinsava a Piranneddu, ka riposa sutta un pedi di pinu ka divintau, pi kistu, loku di kunvirjenza di ntillittuali e turisti, di kuriusi e karusi di skola, loku di kurtura.

 

-26-

Siddu Guttusu s’avissi pututu pittari, di mortu, a so tomba, avissi pinsatu a un balatuni a moddu a un fussatu n’menzu a un parku disabitatu?
Certu Manzù fici du so meghu, e granni fu a pinsata, ma simu sikuri ka Guttusu nun avissi, chuttostu, studiatu korki kosa a kuluri, n’menzu a jenti fistusa e vucazziu di picciriddi? Stannu a l’omu iu pinsai,
visitannu unni fu adivukatu, ka bonu iddu avissi statu na na vucciria di vuci pupulari, di fimmini kumari, di dialettu strittu n’menzu a xaurusi frutti e xuruti erbi, a lapuna e parpaghuna, a maranzani e jummi di kavaddi bardati.
U so padarisu, alivoti, eni akusì. E u padarisu nun sta n’terra, nô palazzu Kattolika da Bâria.
E apò, si sapi, kuantu prima stu parku eksi-patriziu veni puliziatu, abiddutu, graputu ô pukriku gudimentu, e i turisti, a frotta, ntornu a iddu, parrannu tidesku e francisi, spagnolu e ngrisi, russu e cinisi, tutti, piccotti e anziani, vistuti a kuluri, jallu, azolu, russu, virdi, komu frutti e xuri, lapuna e parpaghuna, komu i kuatri du pitturi.

 

-27-

Kuantu kosi rutti, a ddi pedi-pedi. Eni pinsinu mpussibili putiri kaminari senza duviri skarpisari skaghi di bummula e kanali, di  piatta e di lanterni, pisa di tularu di rakamu, petri ntaghati e… storia.
Eni na cità senza nomu certu, ma certu era granni. U tistimonianu i muraghuna di difisa e i pirimitra dî kasi, u tistimonia l’aria ka si rispira, u silenziu ka c’eni e, nô silenziu, ddi rumuricedda ka nun si kapixi dunni venunu ma ka sunu na kustanti na tutti i zoni arkiulojci unni ankora nun s’à prucidutu a ricerki ufficiali.
Pulizzeddu di Ganci komu ddi antiki cità pri-palummiani du sud-Amerika, e di kiddi pri-britannici du stremu urienti, spersi muntagni-muntagni o n’menzu a na jungla mpinitrabili.
Pulizzeddu, komu middi e middi lokura spersi nê kampagni siciliani.

 

-28-

Jà u nomu stissu grapi a porta da fantasia. Siddu apò si veni a sapiri ka na tuttu u munnu ci ni sunu sulu na trîna, a kosa kuminca a sapiri di mistiriusu. A kistu si iunci ka prisenta tracci di oru e autri elimenti ka nun putissi aviri e trasimu kuasi-kuasi nâ fantaxenza. A petra di Salamuni eni tuttu kistu.
Ma nautra strana prisenza di petra c’eni ô Palazzu Adrianu: a Rokka du Saracinu. Ddoku, miravigha dî miravigha, si vidi ka na skalidda ntaghata fa achanari nsinu a n’cima a na turri naturali, a certi banni skavata kû skopu di pighari akua chuvana, a autri banni iuncuta tra di idda stissa ku muricedda di petra a sikku. Si pensa appi a essiri pustazioni di guardia.

 

-29-

Eni un vosku famusu, e c’eni un purpitu, un purpitu di petra. Vonu diri ka Firdinannu di Burbuni, avanti di divintari primu dî dui Sicilî, kuannu era ankora forti a pussibilità ka Napuliuni nun u facissi chu turnari a Napuli, ku tantu di fucili paratu si ni stassi kî so dignitari asittatu supra sta speci di tronu pi sparari, di tantu-n-tantu, â sirvajna ka, pi kasu o pikì ca purtavanu, ci vinia a tiru.
Ora, ka finiu a stissa idea di munarkia, u purpitu du Re eni n’maniu di tutti e veni skifiatu di ncisioni e di skarapochi, e u sidili va kadennu a pezzi, e u stissu vosku da Fikuzza, nun avennu chu dda prupîtà forti e rikanuxuta, eni sujettu a malutrattamentu di parti di l’addivatura ka ci karikanu chu armala di kuantu ni putissi arbirgari.

 

-30-

Eni afrijusu vidiri abiviratura mbiddittati di ristauru frisku e senza chu armala a saziarisi a siti, senza chu ddu xauru di pixu e di kakati amiskati di xekki e di pekuri, di vakki e di krapi, e senza chu ddu xauru di erva taghata friska o di fenu, senza ddu abaiari di kani, senza prisenza di omu.
A Varguarnera di Partiniku sulu korki acidduzzu ngarziddutu friska â kumpagna n’attisa e korki lacertula ritardataria fuia versu a sulichata pi karikarisi i battirî e putiri prukurarisi di mancari.
Na vota, mi rikordu, mentri niku îa ciddiannu nê vaddi tra u paisi di San Fulippu, u chanu da Kûrti e Sant’A, mi firmai a biviri nô kannolu di na abiviratura senza abadari ka kistu piskava na nautra abiviratura chu avuta di artizza ka midema piskava na nautra ankora chu avuta e tutti nkugnati, a skaluni: n’pratika, a kalari a kalari, pî vestî, pî vakki, pi pekuri.
Ku tuttu kistu nun pighai nuddu malannu.

 

-31-

Un iornu, n’menzu a na kampagna tipikamenti siciliana, visti kosi di l’autru munnu: labirinta cirkulari, kavaddi di ferru, unni di cimentu, murati avuti nsinu ô celu e chini di pirtusa, finestri senza kasa, varki lucenti konu l’oru, iazzi supra l’akua, e autri kosi nniskrivibili komu putissiru essiri traversi di binari misi a l’additta o ciramiki cimintati supra na bankina, o kasermi di karabinera a kulura di Arlikkinu, acc. acc.
E tutti sti kosi komu xumara d’arti, abannunati, a kasu, senza ordini aparenti, kuasi ka avissiru kadutu du celu, n’terra,  pi fari miravighari l’omini.
Tanta fantasia fu fruttu di centu artisti e di un sulu ciriveddu, kiddu di nu mprinnituri ka vosi akusì karattirizari u so tempu e a so asistenza.
Arti sulu pi fari arti, komu sfida ê tradizioni kanonici, komu skummissa di libirtà… partennu du Kasteddu di Tusa e iennu pi Santu Stefanu, Pittineu, Rîtanu, Tusa, Kasteddu di Luciu, Motta d’Affermu, Mistretta e, nuovamenti, kalari a mari.

 

-32-

Taliari a miridiuni da marina di Sirakusa e pinsari ka ddabanna ô mari c’eni na isula filici, a nuatri siciliani, ka sta isula aduttammu, fa na certa mprissioni.
Oj a sintimu tantu strania e luntana kuantu eni kunsanguinia e vicina: kurpa da pulitika, kurpa da storia. Di dda storia ka vosi a matripatria asujttata e u so arcipelaku chu pristijusu libiru, o kuasi, e a idda supiriuri n’dignità e urgoghu.
Ma ki ni vali. A radika linguistika nun tradixi e ni iunci, a storia kumuni eni kanuxuta, a civilità miditirrania ni fa frati e soru kî so munumenti antiki, kî so grutti prîstorici.
Kû sapi siddu midema di dda parti c’eni korki martisi ka fa i me stissi rifrissioni. Kû sapi siddu i turisti struiti ka skarpisanu i strati midiuvali di Rabati o ka visitanu a citadi di Zebbugi sentunu na l’aria a prisenza da kurtura siciliana.
Ma ki ni vali, a Storia fici oramai a so strata.

 

-33-

Eni un xumi niku-niku, manku un xumi, pirò avi na granni purtata di akua. Kosa kuriusa: naxi di suttaterra e, unni naxi, forma un laku ka eni frikuintatissimu di tanti specî di aceddi e di chanti ma, supratuttu, di papiru e di kanni.
Na vota era kridenza ka u papiru era jenti nkantata e ka u so karattiristiku cuffu nun era autru ka kapiddi e ka taghannulu â basi avissi suffrutu e ittatu sangu. Eni na chanta tipika du Nilu e u fattu ka si trova n’Sicilia à datu loku a tanti lijenni.
A virità eni ka l’ambienti unni krixi pari majku pikì ditermina effetti di nkantu, di padarisu tirrestri, e u Cani, ddu kursu di akua niku-niku, pari ka fussi granni, granni-granni.

 

-34-

Apò, dopu tantu pirigrinari pu tavulatu ibleu, tra muricedda di pitrami a sikku ka u taghanu di kka e di dda disignannuci miravighusi jumitrî, xinnennu i turnanti ka di Kalafurnu da Gurfa kunnucinu â iankunusa cità di Jsuardu, viu a ogni kurva di strata, komu fussiru guardiani armati di pustazioni militari, karrubi sulitari o n’kumpagnia sparpaghari ligumi duciastri a omini e armala mentri kidda ka eni ora a diserta chana di Maghokku, unni tempu narreri si tammuriava di guerra, aspetta pacinziusa di turnari fistusa a Komisu e â Sicilia.

 

Chusura

Oj staiu n’Palermu, unni travaghu. Cità ka di antika kapitali mpiriali, riali e vici-riali si vitti ariduciri a cità di pruvinca, prima sutta Napoli, apò sutta Turinu, Firenzi e Roma, e midema, ora, nkatinata nê lij ka si fanu a Brusellisi.
Oj, komu kapuloku rijunali, chanci vidennu a Sicilia, urtima apinnici di l’Auropa, senza chu ddi beddi ponti afru-asiatici ka nô passatu kunsintianu di kummircari rikkizza.
Eni propiu na l’agunia di sta Palermu, kapitali di mala puru di nun cediri u xettru di “granni”, unni si rikanuxi a perdita di idintità di un populu sanu ka nun voli adattarisi a l’idea di aviri persu u so “urgoghu di essiri”. Pi kistu kka tanta jenti si sfoga sudisfacennu amimaliskamenti i primitivi bisogni limintari: i so sensi di sprijunanu nô biviri e nô mancari, nô parrari e na l’amurijari, ku spuntanîtadi e naturali disinvurtura.
Ora no chu, Palermu eni veru pulita, ma anni fa a cità si po diri ka avia atruvatu u justu akuilibriu tra lurdia e ijeni: strati-strati c’era ddu tantu di purkaria pi nun fari sentiri asettici i pirsuni e ddu tantu di disatinzioni nô ittari kartuzzi e skamuzzuna di farili sentiri chu naturali e libiri.
Sia charu, kisti kosi na na sucità civili sunu difetta, ma u fattu eni ka pi korki mutivazioni jnetika ô “sicilianu tipu” ci piaci di kuntraveniri ê rekuli, ma sulu kuannu si trova n’Sicilia, mentri ni eni nu skrupulusu usirvanti kuannu si senti ospiti di autri pupulazioni.
Na sta cità, epuru, eni ankora pussibili atravirsarini na longa parti, pi autru karattirizata di viali unni u traffiku autumubilistiku mpirversa, senza essiri tukkati di smogi o rumura. Mi kapita kuannu da me kasa, vicinu a strata da Libirtà, iuncu a pedi â l’Assissuratu di l’Agrikurtura e Furesti ô stratuni da Rijoni Siciliana komu siddu passiassi pî viuzzi di un paisi e pi kampî; l’itinirariu di strata e chani ka fazzu: Duminiku Di Marku – Sinuni Kucca – Pîmunti – Unità d’Italia (vidda Spirlinga) – Skadutu – Justi – U lakunu – Cisareu – Mureddu (San Mikeli) – Markisi – Xuti – Rapisardi – Pikuraru – SS.FF. Nutarbartulu – Finucharu Aprili – Puccini – Zînu – da Kruci (trazzera privata) – Jottu – Munteri – Liunardu di Vinci.
Kista eni Palermu, komu tutta a Sicilia e komu tutti i so skoghi, terra di forti kuntrasti.